Економија 29.01.2024 11:48

Дел од германските компании воведуваат четиридневна работна недела

Дел од германските компании воведуваат четиридневна работна недела

Во Германија на 1 февруари почнува експериментална четиридневна работна недела за 45 компании, како мерка која ќе трае шест месеци.

Во тој период ќе се мери продуктивноста на работниците, а вработените ќе ги добиваат претходните плати без оглед на намаленото работно време, објави Блумберг.

Како што е наведено, целта на експериментот е да се провери дали се точни тврдењата на синдикатот дека луѓето кои работат помалку не само што се посреќни и поздрави, туку и попродуктивни на своите работни места.

Блумберг наведува дека, според прогнозите, до 2034 година германскиот пазар на труд би можел да се намали за повеќе од седум милиони луѓе поради падот на наталитетот и стареењето на населението.

Покрај зголемената продуктивност, се очекува бизнисите да имаат корист од намалувањето на скапото отсуство од работа поради стрес, болест и исцрпеност.

Во 2022 година, Германците отсуствувале од работа во просек по 21,3 дена, што резултирало со загуба од 207 милијарди евра, покажуваат податоците на Федералниот институт за здравје и безбедност при работа.

Поддржувачите на експериментот истакнуваат дека веста би можела да привлече нов персонал во Германија, земја која, според Евростат, веќе има најголем дел од хонорарните вработени во Европската унија.

Недостигот на инвестиции во иновации и дигитализација го попречи растот на продуктивноста во Германија, а без подобрувања во тие области, продуктивноста веројатно нема значително да се зголеми само со намалување на бројот на работни часови, според економистите од Институтот за истражување на пазарот на трудот.

Недостигот од квалификувани работници во Германија, заедно со високата инфлација, ги поттикна работниците во сите индустрии да бараат повисоки плати и намалено работно време.

Германските машиновозачи штрајкуваат веќе десет дена и бараат намалување на работното време од 38 часа неделно на 35 часа без намалување на платите. Синдикатот на вработените во градежниот сектор бара покачување од 20 отсто за голем дел од своите работници.