Економија 18.12.2023 08:50

Инфлацијата во Турција е толку висока што не може да ја поднесе дури ни шефицата на Централната банка!

Инфлацијата во Турција е толку висока што не може да ја поднесе дури ни шефицата на Централната банка!

Турција е на работ на висока инфлација и огромно зголемување на трошоците за домување, толку многу што новата шефица на турската централна банка, Хафизе Гаје Еркан, мора повторно да живее со своите родители.

Хафизе Гаје Еркан е на чело на централната банка во Турција од јуни.

– Не можевме да најдеме сместување во Истанбул. Тоа е ужасно скапо – изјави 44-годишниот Еркан во интервју за весникот Hurriiet.

„Дали е можно Истанбул да е поскап од Менхетен?“, прашува банкарката. Пред да биде именувана на оваа позиција, таа две децении живеела во САД и работела на менаџерски позиции во неколку големи банки, меѓу кои и Голдман Сакс, пишува германски Шпигел. Таа исто така беше една од директорите на Тифани.

Повик до инвеститорите
Во ноември годишната стапка на инфлација во Турција изнесуваше 62 отсто. Во Истанбул за една година кириите се зголемиле за 77,1 отсто, покажува студијата на Универзитетот Бахчешехир.

Турската влада неодамна го ограничи зголемувањето на киријата на 25 отсто. Сепак, ова ја влоши ситуацијата уште повеќе. Сопствениците на станови сега на секој начин се обидуваат да се ослободат од старите станари, чија кирија не смеат да ја зголемуваат, за да го изнајмат станот на некој друг за многу повисока сума. За да ја спречи инфлацијата, турската централна банка ја зголеми основната каматна стапка по назначувањето на Хафиза Гаја Еркан во јуни за 30 процентни поени, на 40 отсто.

Претседателот Реџеп Таип Ердоган претходно долго време се спротивстави на зголемувањето на каматните стапки. Затегнатата монетарна политика почна да има поволен ефект врз потрошувачките цени, но едноцифрена инфлација нема да биде достигната пред 2026 година, рече Хафизе Гаје Еркан во интервју за весникот Хуриет во саботата.

Таа ги повика странските инвеститори да инвестираат во лира, пренесува Bloomberg.

– Во ова време следната година ќе бидеме во поумерено опкружување во однос на инфлацијата и монетарните ограничувања – изјави таа за весникот, додавајќи:

„Ако треба да влезат странски инвеститори, тоа треба да биде сега. Очигледно, ако дојдат подоцна, приносот ќе биде помал.

Хафизе Гаје Еркан вели дека во последните четири недели е зголемена побарувачката на странските инвеститори за државни обврзници, особено оние од САД. Централната банка предвидува дека инфлацијата до крајот на годината ќе достигне 65 отсто, во мај очекува пик од 70 до 75 отсто, а до крајот на следната година може да се спушти на 36 отсто.

БДП расте
Турската економија закрепнува, БДП порасна за 5,9 отсто во третиот квартал во однос на една година претходно, градежниот сектор порасна за 8,1 отсто, но станбената криза е се уште огромна, особено во големите градови. Кириите се зголемени за неверојатни 700 проценти за четири години. Поради високите цени за изнајмување, насилството меѓу станоиздавачите и станарите станува се почесто во Турција: медиумите објавија 11 смртни случаи и 46 повредени, објави Еуроњуз. Во првите шест месеци од годинава евидентирани се 47.000 судски барања за иселување и 100.000 тужби за незаконско покачување на закупнината, што е повеќе од двојно во однос на истиот период лани. Само во изминатата година кириите во просек пораснале за 121 отсто, а во големите градови како Анкара и Истанбул во тој период пораснале за цели 188 отсто – освен инфлацијата, цените пораснале и поради пристигнување на луѓе од подрачјата погодени од земјотресот.