Консултации со УЈП – Скопје од 1 мај само во закажан термин

Доколку за проблем од даночната сфера граѓанин или правно лице сака да се консулирате со даночен агент од Регионална дирекција на Управата за јавни приходи во Скопје од 1 мај задолжително ќе треба да закаже средба по телефон или преку веб страната на контакт центарот на УЈП.

– Закажувањето на средбата е лесно и се реализира преку Инфо центарот на УЈП 0800 33 000 или 02/3253 200 или он-лајн во пет чекори преку веб страницата на Контакт центарот kontaktcentar.ujp.gov.mk која овозможува пристап до услугата „Закажи средба“. Средба може да се закаже од 9 до 15 часот секој ден, во термин и ден кои ќе ги определи даночниот обврзник, но не може да се закаже средба за истиот ден- појасни Михајло Михаилов, раководител на Контакт центарот.

Консултација може да се закаже за добивање на општи информации за рокови, начини за пријавување и плаќање даноци; отворање на бизнис и регистрација на даночен обврзник; консултации за издадени даночни документи; утврдување на даноци; постапки за наплата на долгови; правни прашања и консултација за други специфични прашања.

За овие консултации се ангажирани осум даночни служби.

Одговорните во УЈП – Скопје велат дека на овој начин се намалува метежот на шалтерите се заштедува време на граѓаните и сметководитлеите на фирмите, а агентите ќе бидат подготвени да одговорат на проблемот.

– Според нашите пресметки дневно ќе можат да се организираат 176 средби, бидејќи е панирано тие да траат по 15 минути – вели Мухедин Авдиќ, раководител на сектор за услуги на даночни обврзници и даноци.

Во периодот од 1 декември до сега кога се тестираше ваквиот систем на работа организирани се 100 даночни средби.

Во план е од 1 јануари наредната година консултации да се закажуваат и во другите даночни канцеларии.