На азиските берзи во понеделникот цените на акциите пораснаа во очекување на инвеститорите дека двете големи централни банки – европската и канадската – веројатно ќе ги намалат каматните стапки оваа седмица, што би претставувало следен чекор во глобалната монетарна политика, но сепак сегашната инфлација се заканува да го направи тој процес долгорочен и постепен.
Од Кина утрово пристигнаа подобри вести – индексот на индустриска активност пресметан од приватната компанија „Caixin“ достигна 51,7 поени во мај, по 51,4 поени во април, што е највисоко во последните две години. Во мај, првпат по една година, се зголеми и активноста на јапонските фабрики, а во Јужна Кореја зајакна со највисока стапка во последните две години.
Под овие услови, индексот на акциите на MSCI на азиско-пацифичките акции без оние во Јапонија по околу 6 часот по средноевропско време порасна за 1,4 отсто, со што поврати дел од минатонеделната загуба од 2,5 отсто.
Истовремено, јапонскиот Nikkei индекс порасна за 1,1 отсто, закрепнувајќи од едномесечното ниско ниво на крајот од минатата седмица, додека јужнокорејскиот индекс порасна за 1,8 отсто. Последниот се зголеми по најавата на јужнокорејскиот претседател Јун Сук Јеол дека во морето во источниот дел на земјата најверојатно има големи количества на резерви од нафта и гас.
ECB би можела да ги намали каматните стапки првпат пред Fed
Генерално, изгледите за глобално намалување на каматните стапки го поттикнуваат оптимизмот на пазарите на акции. Европската централна банка (ECB) речиси сигурно размислува за намалување на каматните стапки за 0,25 процентни поени на 3,75 отсто во четврток, што би било првпат во историјата да започне со олабавување на монетарната политика пред американската централна банка Федералните резерви (Federal Reserve – Fed).
Сепак, неочекувано високата инфлација во еврозоната ги избледе надежите за брзо намалување на цената на парите, па пазарните учесници сега очекуваат дека каматните стапки ќе се намалат за само 57 базични поени оваа година. Имено, Eurostat минатата седмица објави дека годишната стапка на инфлација во мај во еврозоната пораснала првпат во последната година, на 2,6 отсто.
„Веројатноста за последователни намалувања на каматните стапки сега се чини многу ниска, при што нивното второ намалување на каматните стапки се очекува во септември“, вели Брус Касман, шеф на економските истражувања во „JPMorgan“.
Пазарот проценува приближно 80 отсто веројатност дека канадската централна банка, исто така, ќе ги намали каматните стапки во среда и ќе ги намали за вкупно 59 базични поени до крајот на годината. Од друга страна, тие очекуваат многу повнимателен пристап од страна на Fed, проценувајќи дека првото намалување на каматните стапки во САД би можело да се случи дури во септември, па дури и тоа е далеку.
Јенот и натаму слабее
На девизните пазари, јапонскиот јен продолжува да има најслаби перформанси во однос на другите светски валути, и покрај тоа што јапонските власти трошат огромни пари интервенирајќи за да го забават неговиот пад. Во периодот од 26-ти април до 29-ти мај Токио потроши повеќе од 62 милијарди долари за девизни интервенции.
Курсот на доларот утринава изнесува 157,09 јени. Во исто време, курсот на еврото цврсто се одржува на 1,0855 долари, што е за 0,1 отсто повисоко отколку во петокот.