Банкарство 07.12.2023 09:17

РАСТЕ ЦЕНАТА НА АКЦИЈАТА НА КОМЕРЦИЈАЛНА БАНКА – очекуваат ли акционерите голема дивиденда од моментално најпрофитабилната банка

РАСТЕ ЦЕНАТА НА АКЦИЈАТА НА КОМЕРЦИЈАЛНА БАНКА – очекуваат ли акционерите голема дивиденда од моментално најпрофитабилната банка

Расте цената на акциите на најголемата а во моментов и најпрофитабилната банка во земјава, Комерцијална банка.

Ако се погледне најновиот билтен на Берзата за ноември може да се види дека Комерцијална банка е второ по ред акционерско друштво кое има најголем пораст на цената на акцијата, односно таа доживеала зголемување за близу 10 отсто или прецизно 9,67 проценти.

Односно, ако на стартот на 11 месец од годинава цената изнесувала 13.005 денари, таа на крајот на ноември изнесува 14.263 денари за акција, што всушност означува месечен пораст од 9,67 отсто.

Ако се погледне графиконот со движењето на цените и количините на Комерцијална банка, може да се види дека од втората половина на ноември, или поконкретно од 22 тој месец, кога цената изнесувала 13.547 денари за акција, па се досега, што значи во последниве две недели, има уште позначаен раст на цената на акциите, односно кривата на графиконот оди по многу поостра нагорна линија.

Или, на вчерашниот ден цената на акцијата се искачи до 14.484 денари за акција. Сепак, значајниот раст на цената не значи и дека се истргувани премногу големи количини во овој анализиран период, иако имало и неколку денови кои можат да се сметаат за своевидни количински пикови.

Или, поголемата количина на акции била истргувана на 27 ноември годинава, кога на берзата биле продадени 1.653 акции на оваа банка, а потоа бројот на истргувани количини се намалува, иако не се намалува во просек некаде под 500 акции.

Вчера на пример, истргуваната количина е 592 акции, додека завчера таа била 418 акции. Која е причината за порастот на цената, што значи и зголемен интерес за оваа акција?

Познавачите велат дека главната причина треба да се бара во високата очекувана дивиденда што би ја донела оваа акција, а која ќе се обзнани како предлог за акционерско собрание најверојатно некаде на средината на март следната година, и да се офиоцијализира еден месец подоцна, кога ќе се одржи самото собрание.

Очекуваната дивиденда, пак, е поради големиот планиран профит на Комерцијална банка за оваа година, а што е сосема логично, ако се има предвид дека само за првите девет месеци од годинава, оваа банка оствари чиста добивка од 50 милиони евра, највисок во нејзината историја и во банкарскиот сектор во земјава воопшто.

Секако, после усвојувањето на завршната сметка на банката, а што се планира за април идната година, се очекува и Комерцијална банка посериозно да почне да преговара околу спојувањето со Стопанска банка Битола, за што двете банки и јавно ги презентираа своите намери во јавноста.

Според Централниот депозитар за хартии од вредност, во моментов единствен акционер со над 5 отсто акции во Комерцијална банка е Адора Инжинеринг на Ванчо Чифлиганец, која поседува 14,99 отсто од вкупниот акционерски капитал на банката.