Постојат сериозни индиции и сомнежи дека СДСМ подготвува масовен поткуп на гласачи за претстојниот референдум, само за некој глас повеќе за поддршка на капитулантскиот договор на Зоран Заев и Алексис Ципрас. Она што Заев го најави од Крива Паланка постојат индиции дека засилено го прават неговите локални пајташи на терен насекаде, истакна Димче Арсовски, портпарол на ВМРО-ДПМНЕ.
-Барањето на Заев да се исплаќаат пари за откажување од сопствениот идентитет освен во приватните компании, постојат сомнежи дека ќе се практикува и во државни институции. Кружат информации дека раководители ќе делат награди и бонуси само за граѓаните да се откажат од името. Целата операција чини поприлично и затоа гледаме секој ден нови задолжувања. Денес Министерството за финансии ќе објави проспекти за ново задолжување од над 30 милиони евра. Ова е само едно во низата милионски задолжувања на оваа власт во период од само неколку месеци. И додека милиони се земаат со високи камати никој не знае каде и на што се трошат парите со кои што не задолжува СДСМ, рече Арсовски и додаде:
„Дека парите се трошат сомнително и завршуваат во нечии џебови говори и фактот што капиталните инвестиции се на историски најниско ниво до сега. Нивото на реализација е најниско за изминативе 20 години, имено од почетокот на годината заклучно со месец август реализацијата на капитални инвестиции е само 23.3%. Ова е недозволиво и доказ само за едно, дека оваа власт не работи ништо и нема план за ништо и парите завршуваат во некои сомнителни дупки. Парите не се трошат за она за што се предвидени“.
Дополнително, потенцираше портпаролот на ВМРО-ДПМНЕ, најавата за ребаланс на Буџетот, фрла сомнеж дека власта ќе крати од капитални инвестиции и ќе префрла пари во сектори кои се помалку значајни.
-Целиот економски крах кој ни се случува е уште еден обид за притисок врз граѓаните да се чувствуваат безпомошни за да мора да гласаат за себе укинување со надеж дека барем за некои си 30 години Република Македонија ќе влезе во ЕУ. Ако е тоа стратегија тогаш е многу погрешна. Граѓаните треба да знаат дека решението на проблемот е во заминување на корумпираната и неспособна влада на Заев, а не во себеукинувањето.