Најостро го осудувам. Тоа сепак претставува чин на агресија, нешто за кое ние предупредувавме дека ќе се случува, дека ваков тип на обиди за ескалација на случувањеата и креирање на етнички тензии дека ќе има и ќе има во иднина. Ако мислите дека ова ќе биде изолиран случај, нема да биде, очекувајте дека ќе има и во иднина, бидејќи како правдата пополека, но сигурно се доближува до криминалците и како ќе затропа на нивните врати, така тие ќе стануваат понервозни, понетрпеливи и единствениот начин да го одбранат криминално стекнатиот капитал е токму вака со манипулирање и предизвикување ваков тип на инциденти.
Ова го истакна премиерот Христијан Мицкоски, кој како одговор на новинарско прашање го коментираше сквернавењето на македонското знаме, честиташе и за брзата реакција.
-Честитам на навремената, трезвена, државничка реакција на МВР и Бирото за јавна безбедност, СВР Скопје, припадниците на МВР кои не дозволија ескалирање, но истовремено реагираа во насока на приведување на лица кои го сквернавеа македонското државно знаме. Тие се веќе приведени, во текот на денот се очекува да бидат изведени пред судија, подвлече Мицкоски и додаде дека нема да има милост кон никого.
-Секој кој ќе ги прекрши Законот и Уставот ќе одговара.
Апелираше и до граѓаните да не дозволат криминални групи да ја дестабилизираат Македонија.
-Ние како Влада гарантираме безбедност, трезвена акција на МВР и државничко однесување.