Битолската градежна компанија „Пелистер“ на познатиот битолски бизнисмен и поранешен политичар Силјан Мицевски за пет месеци доби тендери во вредност од 7,25 милиони евра за ископ на јаглен и јаловина во подинските серии на рудниците на РЕК „Битола“, објавува порталот „Фактор.мк“.
Како што пишува порталот, првиот договор за годинава е склучен во февруари и веќе е реализиран, а на сметка на фирмата на Мицевски, уште познат по прекарот Циле, РЕК исплатил 2,065 милиони евра. Најновиот договор за ископ е склучен пред неполн месец на вредност од 5,19 милиони евра и ќе биде реализиран до крај на година или најдоцна за 12 месеци. Во овие 8 години од 2012 до сега „Пелистер“ на Силјан Мицевски, заедно со „Гранит“, „Трансмет“, „Марковски“ учествувал во бизниси за ископ на јаглен вредни над 90 милиони евра!
„Пелистер“ години наназад е силен партнер на РЕК „Битола“ и ја дава на услуга неговата градежна механизација за копање јаглен и јаловина, а често и за дробење на јагленот.
Силјан Мицевски
Најновиот тендер што го доби „Пелистер“ е за ископ на јаглени јаловина, со сите придружни активности и за тоа компанијата на Циле беше најповолен понудувач с цена од 89,04 денари за гигаџул. Вредноста на договорот што двете страни го склучија пред неполн месец поточно на 13 јули е 320 милиони денари односно 5,19 милиони евра без ДДВ. За 5,2 милиони евра (цената е без ДДВ) „Пелистер“ треба да ископа 646.740 тони јаглен (според спецификацијата) и јаловината што треба да се ископа за да се дојде до јагленот во басенот на рудникот Брод-Гнеотино. Јаловината, според спецификацијата е над 1,7 милиони кубни метри. Станува збор за четири јагленови слоја и уште толку слоја раскривка и јаловина. Носителот на набавката освен обврската да копа треба да го транспортира јагленот до транспортниот систем и да го дроби јагленот во парчиња со големина до 10 сантиметри. Во договорот пишува дека квалитетот на јагленот се мери по превземени 300 тони јаглен во континуитет на дневно ниво и до воведување во функција на автоматски земач на проби. РЕК „Битола“ го задржува правото инцидентно да зема проби за квалитет на јагленот. Договорот е склучен со времетраење од најмногу 12 месеци. Според спецификацијата се гледа дека работата треба да биде завршена за 7 месеци.
Тендерот што го доби претходно за кој е склучен договор во февруари годинава опфаќа ископ на јаглен и јаловина и тоа за вредност од 2,065 милиони евра. Станува збор за 243.000 тони со енергетска вредност од 1,45 милиони гигаџули. Цената што тогаш ја дал „Пелистер“ била 87,8 денари за гигаџул е за нијанса пониска од последната цена по која ја доби работата. Овој договор е склучен на 8 февруари годинава и досега е реализиран и завршен, според достапните податоци од РЕК Битола.
Какви тендери доби „Пелистер“ од 2012 година до сега?
Во мај 2012 година за ископ на јаглен и јаловина од рудникот Брод-Гнеотино „Пелистер“ е носител на набавка заедно со скопски „Гранит“. Добиваат бизнис од кој наплатиле 43,1 милиони евра! Ископале 3,5 милиони тони јаглен рамно на 22,1 милиони гигаџули. Цената по гигаџул? Во првиот лот 114 денари, а во вториот 144 денари што воедно е и највисока постигната цена за која е склучен договор.
Октомври 2014 година, нова тура. Овој пат партнер на „Пелистер“ е „Трансмет“ за сега веќе (првостепено) осудениот Сеад Кочан. Инкасираат 35,5 милиони евра за ископ на околу 2,5 милиони тони односно над 22 милиони гигаџули. Цена? Пониска од претходното: во првиот лот е 79 денари за гигаџул, во вториот 93 денари за гигаџул и транспортот на дробен јаглен 80 денари за тон во должина до 3 километри.
Во ноември 2016 година „Пелистер“ добива соло тендер. Цената за гигаџул е 96 денари. Договорот вреди 4,88 милиони евра, а ископани се помалку од 500.000 тони јаглен.