Повеќе од половина од германските компании кои што работат во земјава сметаат дека екномската состојба во државава е полоша во однос на лани. Сепак, политичката стабилизација им влева оптимизам.
Ова го покажуваат резултатите од анкетата спроведена меѓу германските бизнисмени кои што работат во Македонија. Вкупно 45% од германските директори очекуваат подобрување на бизнис климата, а 12% од нив очекуваат понатамошно влошување.
„Годинава, некој од факторите кои минатите години беа оценети како негативни се подобрени, но повторно испитаниците не се задоволни од сузбивањето на корупцијата и криминалот, правната сигурност и ефикасноста на јавната администрација. И покрај наведените проблеми, сепак е охрабрувачки фактот дека 72% од компаниите кои работат во Македонија повторно би инвестирале во земјата“, рече Патрик Мартенс, директор на Македонска-германска стопанска комора.
Според анкетата, 68% од фирмите очекуваат дека ќе се зголеми нивната продажба, а 45% очекуваат раст на извозот во наредниот период. Нивните најголеми стравувања се однесуваат на наоѓање на квалификуван кадар. Бизнисмените констатирале дека политичката криза влијаела негативно врз нивното работење.
Инаку, анкетата е правена за време на политичката криза. Оптимизамот кај геманските компании се зголемил после позитивната препорака која ја доби Македонија за почетокот на преговори со Европската Унија, како и напредокот во преговорите со името.