Претседателот на ВМРО-ДПМНЕ, Христијан Мицкоски денеска оствари средба со министерот за Европа и Америка во британскиот Форин Офис, Сер Алан Данкан.
-На средбата соговорниците говореа за актуелните политички случувања во Македонија, евроатлантските интеграции на држава и претстојниот референдум за договорот со Грција. На средбата се потенцираше и значењето на евроатлантските интеграции за Република Македонија. Мицкоски порача дека членството на Македонија во ЕУ и НАТО е од стратешки и државен интерес, стои во партиското соопштение на ВМРО-ДПМНЕ.
Како што брифираат од партијата Мицкоски го реафирмирал ставот дека ВМРО-ДПМНЕ не може да го прифати Договорот со Грција, бидејќи ВМРО-ДПМНЕ не се согласува со содржината на овој договор. Претседателот на ВМРО-ДПМНЕ го повторил и ставот дека граѓаните на Македонија имаат доволно политичка зрелост и се достоинствени за сами да донесат одлука како ќе постапат на 30-ти септември.
Соговорниците се согласија дека билатералните односи помеѓу Република Македонија и Обединетото Кралство се силно развиените, но беше истакната и потреба од понатамошно надградување на истите. Мицкоски ја афирмираше стратешката определба на ВМРО-ДПМНЕ за интеграција во ЕУ и НАТО, се додава во партиското соопштение по повод средбата на Мицкоски со Данкан.