Од ВМРО-ДПМНЕ велат дека кога криминалот и корупцијата стануваат пракса во работењето на власта, науката и образованието од приоритет се запоставуваат и страдаат. Членот на Извршниот Комитет на УМС на ВМРО-ДПМНЕ, Филип Ѓоргиев вели дека Република Македонија доживеа уште еден пораз, ниту еден универзитет во државата не се најде во првите илјада на Шангајската листа.
-Универзитетите од целиот регион се наоѓаат во првите илјади универзитети на оваа листа. Според оваа листа универзитетите во соседството како Белград, Атина, Љубљана, Софија, Солун, нудат далеку подобро образование од нашите. Државата наместо да оди напред, оди назад. Власта се однесува индолентно и е целосно неспособна. Негрижата и немањето на стратегија во високото образование, немотивираноста на наставниот кадар, експериментирањето и политизацијата на образованието се главните причинители за овие лошите резултати, изјави Ѓоргиев.
Тој потенцираше дека со вакво неквалитетно образование не се оди во ЕУ, со вакво неквалитетно образование се загрозува иднината на Република Македонија. Според него младите се најголемата жртва на неодговорните политики на СДСМ.
-Власта ги уништува идните генерации и им го одзема правото на квалитетно образование. Образованието стагнира, СДСМ се што вети излажа. Ветуваа подобро образование, добивме образование на дното во светот. Ветуваа подобар студентски стандард и инвестиции во образовната инфраструктура, факултети, институти и студентски домови, а сега гледаме дека за ништо од тоа нема одвоено средства. Власта која ветуваше студентски град, нема поставено една цигла во студентските домови во државата. Откако СДСМ е на власт ниту една инвестиција не е реализирана во образованието. Не смееме да дозволиме образованието да биде жртва на неодговорноста на СДСМ. Оваа власт мора да си оди, изјави Ѓоргиев.
Тој нагласи дека ВМРО-ДПМНЕ во идниот период ќе понуди голема авангардна програма за сите млади во Република Македонија.