Капитулантскиот договор со Грција, кој го потпиша владата на Зоран Заев е на директна штета на Република Македонија, ние го губиме идентитетот, преку институционаниот идентитет, историјата и културата, истакна генералниот секретар Игор Јанушев при вчерашната посета на Пехчево.
Јанушев рече дека со договорот преку Членот 8 од истиот се дава алатка во рацете на Грција преку Комисијата за ревизија на културата, историјата и археологијата да го попречи нашиот пат кон ЕУ кога и да посака.
Генералниот секретар нагласи и дека во целиот овој период додека ни зборуваат за европски вредности во суштина прават огромен криминал.
-Додека ја раскрчмуваат државата по сите основи граѓаните страдаат е општиот заклучок на пехчевци. Во Пехчево како и во остатокот од Македонија владее тага. Млади во општината скоро и да нема, секој месец постарите жители кои немаат кај да заминат гледаат како по некоја фамилија трајно се иселува од државата, ги затвораат куќите и си одат, тажно коментираат возрасните пехчевци, кои тагуваат по заминатите синови и ќерки, внуци и внуќи. СДСМ нема направено ништо за Пехчево. Ниту еден проект. Со своите погрешни политики само ги забрзува одлуките на жителите да си заминат, рече тој и додаде:
„Општината која е сливарски регион годинава се соочи со дебакл, сливата првин немаше откуп, со што илјадници тони скапаа по нивите, за на крај да се откупува по мизерни 4-5 денари. Земјоделецот овде е скршен и оставен без помош од државата, која Зоран Заев пред изборите лично им ја ветувал. Пехчево е еден од бројните докази зошто оваа власт мора да си замине. На тагата мора да и дојде крај. Република Македонија мора да напредува“.