Лондон и Брисел ќе направат пауза во преговорите за излез на Велика Британија од Европската Унија и нема повторно да се состануваат пред европскиот самит, закажан за средината на следната недела, потврдија синоќа европски извори на кои се повикуваат западните новински агенции.
Претходно беше објавена вест дека договорот за брегзит е постигнат, но се утврдило дека станува збор за лажна вест на која во последно време не се имуни ниту водечките европски медиуми.
Во меѓувреме, неколку европски официјални лица потврдија дека европскиот преговарач Мајкл Барни ќе ги извести челниците на 27-те земји членки на ЕУ за ситуацијата со преговорите в среда, непосредно пред самитот на кој ќе учествува и британската премиерка, Тереза Меј.
„И покрај интензивните напори, неколку клучни прашања остануваат отворени“, објави на Твитер европскиот преговарач Мајкл Барни.
Преговарачите за брегзит се сретнаа синоќа во Брисел, но не успеаја да постигнат конечен договор за условите за излез на Британија од ЕУ, а камен на сопнување повторно е најспорното прашање – границата меѓу Република Ирска и Северна Ирска.