Народниот правобранител отвори постапка и будно ги следи настаните за постапувањето на полицијата на протестите пред Собранието на Република Македонија против Договорот со Грција за името, информира заменик народниот правобранител Васка Бајрамовска-Мустафа.
На 17 јуни полицијата беше обвинета од дел од јавноста дека користела прекумерна сила, односно употреба на солзавец и шок-бомби, од кои последици почувствувале случајни минувачи, односно незасегнати во протестот за неменување на уставното име. МВР возврати дека полицијата морала така да реагира бидејќи ситуацијата ескалирала и се заканувал насилен влез во Собранието на РМ од страна на толпата.
Веќе во два случаја имаме поднесени претставки од граѓани и непосредно од заинтересирано лице кое се почувствувало повредено, во кои се укажува на наводи за користење, односно употреба на средства за присилба и употреба на сила од страна на полицијата. Постапките се во тек и се преземаат мерки во надлежните одделенија на Народниот правобранител, рече Бајрамовска-Мустафа на денешната прес-конференција во одговор на новинарско прашање.