Основното јавно обвинителство Скопје ја прекина истражната постапка и не поднесе обвинение против третото осомничено лице за убиството на Никола Саздовски Саздо, за кого во јавноста гласно се шпекулира дека има блиски релации со власта. Додека пак за другите две е поднесена кривична пријава за убиство.
Како што информираат од Обвинителството против третото осомничено лице, за кое се водеше истражна постапка за ова кривично дело, како соизвршител постапката е прекината бидејќи тој не бил достапен за државните органи.
-Против третото осомничено лице, за кое обвинителството исто така водеше истражна постапка за истото кривично дело како соизвршител заедно со двајцата сега обвинети, согласно член 300 од Законот за кривична постапка, надлежниот јавен обвинител донесе Наредба со која ја прекина истражната постапка. Имено, со оглед на тоа што трето осомничениот се уште е недостапен на државните органи, за ова лице за кое е распишана домашна и меѓународна потерница, истражната постапка ќе продолжи во моментот кога ќе биде достапно на државните органи, информираат од ОЈО.
Низ јавноста долго време се шпекулира дека обвинетиот кој е во бегство има блиски релации со власта, па низ јавноста гласно се поставува прашањето дали со ова се потврдуваат тие шпекулации, т.е. дека тој ја има поддршката од власта за да ја избегне казната за убиството на младиот Саздо.
Основното јавно обвинителство Скопје информира денеска поднело Обвинителен акт со предлог за продолжување на мерката Притвор против две лица за сторено кривично дело– Убиство од член 123 став 2 точка 1 во врска со член 22 од Кривичниот законик. На обвинетите им се става на товар дека заеднички и на свиреп начин го лишиле од живот оштетениот Никола Саздовски.
-Обвинетите на 29 јуни 2018 година околу 17.45 часот на Бул. Александар Македонски во Скопје, на автобуската постојка пред фабриката Алкалоид, му пристапиле на оштетениот и му побарале лична карта. Откако оштетениот им ја покажал личната карта, обвинетите неочекувано започнале заедно истовремено да го удираат со боксови во пределот на главата и градите. Од силните удари оштетениот загубил рамнотежа, паднал на тротоарот, по што обвинетите без милост, истовремено и со силни удари продолжиле со клоци да го удираат по главата и градите. Од ударите оштетениот се здобил со тешки телесни повреди со конкретна опасност по животот и западнал во коматозна состојба. Тој бил пренесен во ургентниот центар при Клиничкиот центар Мајка Тереза. Истиот ден бил пренесен во Јавната здравствена установа Универзитетска клиника за трауматологија, ортопедски болести, анестезија, реанимација и интензивно лекување и ургентен центар – Скопје , Одделение за анестезија и реанимација, каде на 3 јули 2018 година била констатирана мозочна смрт. Како резултата на здобиените повреди на 9 јули 2018 година оштетениот починал, се вели во соопштението на ОЈО.
Од таму велат дека истовремено со поднесување на обвинителниот акт, надлежниот јавен обвинител од Основното јавно обвинителство Скопје предложи против двете обвинети лица да биде продолжена мерката притвор согласно член 165 став 1 точка 1 и 2 од Законот за кривична постапка, бидејќи ценеше дека постои опасност од бегство и постои оправдан страв дека во текот на кривичната постапка обвинетите ќе влијаат на сведоците.
-Поднесувањето на обвинителниот акт следи по спроведена истражна постапка против двајцата обвинети за кривичното дело за кое што се обвинуваат. Во текот на истражната постапка обвинетите беа испитани и дадоа своја одбрана пред надлежен јавен обвинител. Согласно член 302 од Законот за кривична постапка пред завршување на истражната постапка писмено беа известени обвинетите и нивните бранители за да извршат увид во обезбедените докази. При вршење на увидот тие не предложија прибавување на други докази во текот на истражната постапка, информираат од ОЈО.