Опаднал бројот на читатели во библиотеките за период од неколку години, покажуваат статистиките.
Во 2010 година, библиотеките во Македонија имале 62 илјади членови, во 2013 година бројот скокнал на 101 илјади, а во 2016 паднал на 43 илјади членови. Овие податоци ги објави Државниот завод за статистика, во публикацијата „Македонија во бројки“, и тие покажуваат надолен тренд. Мислењата за тоа дали имаме зголемена или намалена читателска публика се поделени. Дел од библиотекарите тврдат дека читалните се празни, иако по одредени поводи како патронен празник и почеток на учебна година се случува да има и акција за бесплатно зачленување. Се спомнува и фактот дека младите имаат опција да читаат книги и на интернет.
Но, има и библиотеки кои се задоволни од бројката на читатели.
„Ние имаме зголемување на бројот на читатели. Лани беа над 400, а сега се повеќе од 500, што значи дека имаме стотина читатели повеќе. Интересно е што и постарите сакаат да читаат, членовите бараат литература и на англиски јазик, а студентите читаат стручна литература“, вели Билјана Петровска, директорка на јавната локална библиотека „Илинден“ од Делчево.
Од библиотеката „Ванчо Прке“ во Виница велат дека лани имале 930, а сега имаат 990 читатели, при што меѓу нив има и вработени, невработени, најголем дел или 633 се ученици, но има и по педесетина студенти и пензионери.
Од струмичката библиотека „Благој Јанков Мучето“ објаснуваат дека се задоволни со бројот на читатели, и дека имаат различни форми за привлекување на читатели, саеми, промоции.
„Најмладиот читател има 3 години, а најстариот е читателка на возраст од 87 години. Од 7 до 19 часот, додека да ја затвориме библиотеката ние имаме корисници и сме задоволни, иако сме мал тим, функционираме прекрасно“, изјави директорката Тања Гошева.
Од библиотеката „Страшо Пинџур“ во Неготино, велат дека откако во 2015 година преминале од затворен во отворен тип, односно наместо на шалтери, сами читателите да си бираат книга, имаат повеќе корисници. Сега таа бројка е околу 1.000, а велат дека највеќе се чита белетристика.
Ако споредиме со други земји, податоците од Европската статистичка служба годинава покажаа дека најмногу читаат Естонците, или во просек по 13 минути дневно посветуваат на читање, а зад нив се Финците и Полјаците со по 12 минути читање дневно.